धोका फार आहे

लावलेली खंजिराला धार आहे
आपुल्यापासून धोका फार आहे

ऊब मायेची कुठेही सापडेना
चालला चोहीकडे व्यापार आहे

भाजणे पोळ्या चितेवर आपुल्यांच्या
हेच आता संस्कृतीचे सार आहे

अल्पसंतुषटी अशी की पोट भरता!
स्वप्न झाले वाटते साकार आहे

सासरा, काका असो वा दीर घरचा
ग्रस्त भीतीने बिचारी नार आहे

बुध्दिवाद्यांनो चिडा अन्याय बघुनी
लेखणी हातातली तलवार आहे

कोडगा झालो, न कण्हतो वेदनांनी
संकटांचा जीवनी भडिमार आहे

थाट प्रेताचा किती तो अंतयात्री !
व्यर्थ जगलो ही खरी तक्रार आहे

ठेविले जैसे अनंते सांजवेळी
राहण्याचा अंतरी निर्धार आहे

वाटले "निशिकांत"ला नेता बनावे
घाण दिसता घेतली माघार आहे


निशिकांत देशपांडे. मो.क्र.९८९०७ ९९०२३
E mail--- nishides1944@yahoo.com

शल्य टोचले कधीच नाही

स्फुल्लिंगावर राख एवढी, रान पेटले कधीच नाही
जीवन जगलो पिंजर्‍यातले, शल्य टोचले कधीच नाही

"कष्ट करोनी पोट भरावे" कसेबसे हे शक्य जाहले
क्षितिजाच्याही पुढे जगावे असे वाटले कधीच बाही

स्फुरण पावती बाहू ज्यांचे त्या योध्द्यांची जिद्द आगळी
दान करोनी कवच कुंडले युध्द टाळले कधीच नाही

जन्मपत्रिका जुळल्या नव्हत्या, एकाला मंगळही होता
पेम भावना उदात्त इतकी, कुणी भांडले कधीच नाही

प्रवचानातुनी ज्ञान सांगणे पेशा झाला कैकजणांचा
जे सांगितले ते स्वतःने तत्व पाळले कधीच नाही

जन्म मरण या शापांमधले अंतर म्हणजे जीवन असते
तरी सुखाच्या मागे पळणे व्यर्थ भासले कधीच नाही

आठरा वर्षे सरण्याआधी प्रौढ वयाचे गुन्हे करावे
बाल बलात्कार्‍याला फाशी दिली, ऐकले कधीच नाही

संजय होता पत्रकार पण हळू बातम्या सांगत होता
न्यूज ब्रेकने धृतराष्ट्राचे पित्त खवळले कधीच नाही

प्रेम दावण्या ताजमहल का? "निशिकांता"ला कधी न कळले
अमर प्रेम कबरीत पुरावे मनास पटले कधीच नाही


निशिकांत देशपांडे. मो.क्र. ९८९०७ ९९०२३
E Mail--- nishides1944@yahoo.com