मी का कुढावे?

व्हायचे ते नेमके झाले म्हणावे
दोष अपुला मानुनी मी का कुढावे?

देवद्वारी फक्त माथा टेकल्याने
"संकटे पळतील" हे का बिंबवावे?

आसवांनो बांध तोडा पापण्यांचे
का कपारींना मनाच्या चिंबवावे?

आज अन् ज्यांचा उद्या अंधारमय, त्या
माणसांनी भूतकाळी झगमगावे

मीच कर्ता आजच्या माझ्या व्यथांचा
प्रश्न माझे निश्चये मी सोडवावे

वेदनांचे चैत्रबन मंत्रावलेले
त्यात जगलो, भाग्य फुलले मी म्हणावे

का असे गुंत्यात नाते गुंतलेले?
काच का इतके मनाला करकचावे?

वाद दोघांचा कसा गेला शिगेला?
का असे उन्मुक्त भरकटतात रावे?

वेगळा "निशिकांत" होता काळ तो पण
संपलेल्याचे किती कौतुक करावे?


निशिकांत देशपांडे. मो.क्र. ९८९०७ ९९०२३
E Mail--- nishides1944@yahoo.com

शहारे मिटावे कसे?

तुझी भेट होता मनी जागलेले हजारो शहारे मिटावे कसे?
चिरंजीव स्वप्ने मनी कोरलेली, अधूरी असोनी जगावे कसे?

सखे ब्रह्मकमळाप्रमाणे उमलणे तुझे एकदा फक्त वर्षातुनी
मनाच्या कपारीत गंधाळलेल्या क्षणांना प्रिये जोजवावे कसे?

किती हासण्याची तर्‍हा वेगळी! तू करावेस घायाळ कोणासही
तरी भोवती घोळका सावजांचा, कळेना तुला न्याहळावे कसे?

जशी चाळली डायरी जीवनाची, तुझ्या पावलांचेच दिसले ठसे
समासातला कोपरा एक माझा, तरी पान माझे म्हणावे कसे?

जरी वादळे लाख आली नि गेली, भिऊनी किनारा न  धरला कधी
तुझा हात आश्वस्थ हातात असता, पुढे ध्येय, मागे वळावे कसे?

तुझ्या चाहुलीने निळे चांदणेही तुझा शोध घ्याया किती लागले!
जगी पौर्णिमेला अंधार झाला, कुठे चंद्र गेला कळावे कसे?

किती रेशमी खास नाजूक नाते, तुझ्या आणि माझ्यातले सांग ना!
ह्ळूवार जपणे न जमल्यास सखये, दवांचे फुलांशी निभावे कसे?

असे पैंजणांना नको वाजवू ना! शिकावेस चालायला तू हळू
तुझ्या चाहुलीने उरी आस उमले, मनाला सखे आवरावे कसे?

कुणी मूर्ख "स्मृतिभ्रंश" वर मागतो का? जसा तुष्टतो देव त्याच्यावरी
म्हणे प्रश्न सुटला "निशिकांत"चा की. "तुला नेहमी आठवावे कसे?


निशिकांत देशपांडे. मो.क्र. ९८९०७ ९९०२३
E Mail---nishides1944@yahoo.com

भोगलेल्या वेदनांची

मांडली आरास आहे, भोगलेल्या वेदनांची
तोरणे दारास माझ्या जीवनाच्या लक्तरांची

मेजवानी नित्त्य येथे दु:ख, ओल्या आसवांची
झोप नांदे, ठीक असती स्पंदनेही काळजांची

आमुच्या वस्तीत दु:खांना छटा असते सुखांची
आसवांनीही हसावे रीत इथल्या पामरांची

सुरकुत्यांच्या आड मी आहे कहाणी वादळांची
का दयेची भीक देता? जात माझी कातळांची

कष्टल्याने घाम देई दर्प अंगाला असा की
धुंदतो, मग का असावी ओढ ऊंची अत्तरांची?

कोण धोकेबाज होते? वादळी चर्चा कशाला?
डायरी भिरकावली मी  नोंदलेल्या वंचनांची


सर्व धर्मांनीच अपुले थाटले बाजार इतके!
लूट असते नेहमी भक्ताळलेल्या भाविकांची

तारखेवर तारखा पडतात पण न्यायाधिशांना
जाण नसते अर्जदारांच्या जराही यातनांची

नाव तू "निशिकांत" लिहिशी नेहमी मक्त्यात अपुले
लागते गझलेत चाहुल, का सखीच्या पैंजणांची?


निशिकांत देशपांडे. मो.क्र्क.९८९०७ ९९०२३
E Mail--- nishides1944@yahoo.com

हृदयी वसंत फुलला

पाऊस आठवांचा धो धो जसा बरसला
मन पल्लवीत झाले, हृदयी वसंत फुलला

रंगात रंगले मी सखया तुझ्या अशी की!
हरवून स्वत्व गेले, पण ताल सूर जुळला

बांधेन राजवाडा अल्पावधीत मी पण
तुझिया मनात घरटे करण्यात जन्म सरला

तू काफिया, अलामत अन् मी रदीफ होता
ईर्शाद मैफिलीचा, तकिया कलाम बनला

माझ्या नभात कोठे, नसतात चंद्र तारे
अंधार पाचवीला का जन्मताच पुजला?

दैदिप्यमान शिखरे इतिहास दावतो पण
शोधून वर्तमानी, विभुती न एक दिसला

आहे किती दरिद्री श्रीमंत वर्ग येथे!
पैशाशिवाय दुसरा, संचय करू न शकला

पुसण्यास भाव गेलो मंडीत अन् कळाले
श्रीमान सत्त्यवादी, बेमोल काल विकला

"निशिकांत" वाट पुढची अवघड जरूर आहे
पण चालणे कुणी का सोडून स्वस्थ बसला?


निशिकांत देशपांडे. मो. क्र. ९८९०७ ९९०२३
E Mail--- nishides1944@yahoo.com

पेलुनी भार पावित्र्या

पार मी वाकलो थकलो पेलुनी भार पावित्र्या
जीवनाचे तरी समजू न शकलो सार पावित्र्या

तुझे का स्वप्न रंगावे समाजाच्या मनी इतके?
दुर्बलांना हवा असतो तुझा आधार पावित्र्या

तुझा फडके जिथे झेंडा, आश्रमी भेटण्या गेलो
काक शिवण्याअधी तेथे बाटली नार पावित्र्या

पाप, खोट्यांस राजाश्रय, तयांचा थाट दरबारी
तुझे दुर्दैव तू व्हावे, आज द्वापार पावित्र्या

कुंभमेळे, पुजाअर्चा, दक्षिणा मोठमोठाल्या
जगाने मांडला आहे तुझा बाजार पावित्र्या

जगी म्हणतात शुचितेला "तुझी ऐशी कि तैशी" का?
तुझ्यावाचून कोणीही ना निराधार पावित्र्या

नेसता वस्त्र भगवे अन् घालता माळ तुळशीची
झाकला निश्चये जातो कसा व्यभिचार पावित्र्या?

मनाला मारुनी जगलो तुझ्याशी नाळ जोडाया
तरी पण प्राक्तनाचा का जाहला वार पावित्र्या?

शोध" निशिकांत "ला होता, पण कुठे भेट ना झाली
दिला निर्जन जरी रस्ता, तुझे आभार पावित्र्या


निशिकांत देशपांडे. मो.क्र. ९८९०७ ९९०२३
E Mail---nishides1944@yahoo.com