स्वप्नांशी मी खेळत होतो

मृगजळ सारे जाणत होतो
स्वप्नांशी मी खेळत होतो

फुले उमलती क्षणात सुकती
निवडुंगांच्या सोबत होतो

संवादाची किती वानवा !
माझ्याशी मी बोलत होतो

दगाबाज अपुल्यातच असतो
म्हणून पाळत ठेवत होतो

व्यवहाराच्या कसोटीत मी
वजावटींना झेलत होतो

माझा होता दोष तरी पण
भाग्याला मी कोसत होतो

गुन्हे कराया हिंमत नव्हती
कायद्यास मी पाळत होतो

उडिदाच्या काळ्यातच गोर्‍या
नेत्यांना मी शोधत होतो

राजकारणी बाप नसोनी
उमेदवारी मागत होतो

"निशिकांता" मी बहिर्‍यांनाही
कसे जगावे सांगत होतो


निशिकांत देशपांडे मो.क्र. ९८९०७ ९९०२३
E Mail--- nishides1944@yahoo.com