प्रीत जपावी

नजर कधी नजरेस भिडावी
डोळ्यांमधली प्रीत जपावी

पुरे जाहले स्वप्न पाहणे
आता थोडी झोप उडावी

चिंब व्हावया मन आसुसले
मनभावन बरसात पडावी

अशीच केंव्हा तरी कुठे का?
भेट आपुली रोज घडावी

उष्ण श्वास अन् रोमांचांनी
रात्र आपुली धुंद सजावी

तुझी सुरावट, माझ्या कविता
मैफिल रंगतदार बनावी

जरी वेगळे, दोघांच्याही
स्वप्ने नयनी एक असावी

शिकार झालो तुझी, वाटते
पुन्हा एकदा शिकार व्हावी

आठवणींचा नकोच गुंता
विसरायाची रीत नसावी

आयुष्याच्या सायंकाळी
हीच टवटवी मनी टिकावी

"निशिकांता"ला तुला बघोनी
कधी रुबाई, गझल सुचावी


निशिकांत देशपांडे. मो. क्र. ९८९०७ ९९०२३
E Mail--- nishides1944@yahoo.com