एवढी तक्रार आहे

वाहणार्‍या आसवांची एवढी तक्रार आहे
आपुल्यांनी वार केले, मूक का चित्कार आहे?

बंद का संवाद झाला? शांत ही वस्ती मुक्यांची
सांगतो गोष्टी स्वतःला, देत मी हुंकार आहे

बेसहारा बालकांच्या आश्रमाचे बिंग फुटले
रोज माळ्याचा कळ्यांशी चालतो व्यभिचार आहे

देश लुटला मुक्त हस्ते, कोणते सत्कार्य केले?
का तरी तिस्मारखाँचा, योजिला सत्कार आहे

वेस गेली, पार गेला, का तुम्ही शहरतल्यांनो
गाव गिळले, संस्कृतीचा करविला संहार आहे?

पोलिसांनी नोंद केली तत्क्षणी जर का गुन्ह्याची
निश्चये ठाण्यात झाला, त्या अधी व्यवहार आहे

छेडता पोरींस का रस्त्यावरी रे डँबिसांनो?
ज्येष्ठ करता हेच लपुनी, सभ्य शिष्टाचार आहे

जानवे हरवून गेले, बाप संध्याही विसरला
सोहळा व्रतबंध झाला एक सोपस्कार आहे

संकटे घोंघावती पण घोर "निशिकांता"स नाही
वादळांना तोंड देणे, जीवनाचे सार आहे


निशिकांत देशपांडे. मो.क्र. ९८९०७ ९९०२३
E Mail--- nishides1944@yahoo.com

तृप्ती शोधतो आहे

पंचतारांकित चवीला भोगतो आहे
भाकरी पिठल्यात तृप्ती शोधतो आहे

अंतरी भक्ती नसोनी, रोज जगदंबे,
पोट भरण्या जोगवा मी मागतो आहे

का मनाची व्यर्थ केली स्वच्छता इतकी?
आज जो तो चेहर्‍याला पाहतो आहे

मंदिरी जो कैद आहे देव, त्याला मी
का अजूनी सर्वसाक्षी मानतो आहे?

साजरा फादर्स डे करतोस का पोरा?
दान पिंडाचे मृतात्मा मागतो आहे

वाट नाही पाहिली केंव्हा कुणी ज्याची
त्या भणंगालाच मृत्यू टाळतो आहे

रोजचे घटतेच आहे मुल्य पैशांचे
छापल्या नोटात गांधी हासतो आहे

मनसुबे ऐकून घरचे, स्त्री भ्रुणालाही
जन्म श्वानाचा हवासा वाटतो आहे

मुखवट्यांवर भाळला "निशिकांत" इतका की
चोरही साधूच त्याला भासतो आहे


निशिकांत देशपांडे. मो.क्र. ९८९०७ ९९०२३

रुसल्यासारखी तू

का अशी दिसतेस रुसल्यासारखी तू?
हास्य ओठी आत सुकल्यासारखी तू

मैफिलीचा सूर असणारी शमा, पण
मंद का जळतेस विझल्यासारखी तू?

जिंकुनी खेळातली हरएक बाजी
का अशी कण्हतेस हरल्यासारखी तू?

चौकटी कोणी ठरवल्या? तोड त्यांना
वाग चंडी मुक्त असल्यासारखी तू

द्रौपदी, सीता, अहिल्या पात्र दुय्यम
का तरी जगतेस रमल्यासारखी तू?

बळ दिले आहे तुला परमेश्वराने
घे भरारी पंख फुटल्यासारखी तू

दीर्घ झालेला सुरू एल्गार, पण का?
श्रीगणेशालाच खचल्यासारखी तू

आस ह्रदयी माझिया दुर्दम्य आहे
एकदा दिसशील हसल्यासारखी तू

काचतो "निशिकांत"ला सहवास जेंव्हा
भोवती असतेस नसल्यासारखी तू


निशिकांत देशपांडे. मो.क्र. ९८९०७ ९९०२३
E Mail--- nishides1944@yahoo.com

स्पष्ट झाले पाहिजे

व्हायचे ते मोकळे अन् स्पष्ट झाले पाहिजे
साथ तू देशील कुठवर हे कळाले पाहिजे

पूर्तता एका अटीची प्रेम करताना हवी
संशयाचे भूत आधी धुम पळाया पाहिजे

राव-रंकातील खाई पेटुनी उठण्याअधी
गाळल्या घामास मोठे मोल आले पाहिजे

दंगलीने पोळल्यांची सांत्वने फसवी किती!
करवित्याचेही विधात्या! घर जळाले पाहिजे

जर वसंताने नटावे आस अंकुरली मनी
वृक्ष जाणे पान शेवटचे गळाले पाहिजे

"दे हरी बाजेवरी" हे तत्व नाही या जगी
सागरी, मोती हवे तर, मज बुडाले पाहिजे

पाप करण्याचा निराळा तर्क आहे हा किती!
स्नान गंगेचे कराया मन मळाले पाहिजे

सार का ज्ञानेश्वरीचे आठवेना शासना?
जे हवे ते ते जनालाही मिळाले पाहिजे

पाश का "निशिकांत" विणले? जे गळ्याला काचती
खेळ सरला या जगीचा, चल निघाले पाहिजे


निशिकांत देशपांडे. मो.क्र. ९८९०७ ९९०२३
E Mail--- nishides1944@yahoo.com