निर्माल्य होउन जायचे

का कुणासाठी उगा उमलायचे?
अन् उद्या निर्माल्य होउन जायचे

बंद ज्येष्ठांनो करा सांगायचे
येथुनी पुढती अता ऐकायचे

कासरा हाती दिला आहे तुझ्या
दावल्या वाटेवरी चालायचे

अंध प्रेमाची मजा लुटल्यावरी
व्यर्थ का डोळे अता उघडायचे?

लावला कबरीवरी कोणी दिवा?
चाहुलीने आत झंकारायचे

तत्व तुमचे का कुणावर लादता?
वागतिल ज्यांना जसे वागायचे

जे मना पटते तसे वागावया
लोक म्हणतिल काय हे विसरायाचे

खोदली मोठी कबर माझ्या मनी
आठवांचे खोल क्षण दफनायचे

तंत्र हे कोणी दिले "निशिकांत"ला?
दु:ख, आनंदे कसे सोसायचे


निशिकांत देश्पांडे. मो.क्र. ९८९०७ ९९०२३
E Mail--- nishides1944@yahoo.com