म्हणे कुठेही दह्शत नाही !

म्हणे कुठेही दह्शत नाही !
धैर्याला का बरकत नाही ?

माणुसकीचे लक्षण आहे
कुणी कुणाला जिंकत नाही

किती आळणी जीवनशैली !
पाय जराही घसरत नाही

तिला मारला धक्का त्याने
प्रवासातली गफलत नाही

व्हाट्स अ‍ॅपवर चोविस घंटे
घरी बोलण्या फुरसत नाही

चंदन झिजते सुगंध देण्या
ढोल आपले बडवत नाही

तिने जगावे मानाने ही
छोटी मोठी कसरत नाही

असो संहिता आचाराची
हवे तसे कर हरकत नाही

शेण चारल्या शिवाय कुठला
कागद पुढती सरकत नाही

शोककथा ही सुशिक्षितांची
एक दुज्याशी सहमत नाही

"निशिकांता"च्या मनात श्रावण
हिरवळ इथली संपत नाही


निशिकांत देशपांडे. मो.क्र. ९८९०७ ९९०२३
E Mail--- nishdes1944@yahoo.com