एवढे का गुदमरावे?

एवढे का गुदमरावे, भावनांच्या वादळाने
भार हलका होत असतो आपुल्यांशी बोलल्याने

हास्य ओठी आत कावा, मी सखे दुर्लक्ष केले
स्त्रीच "मा" करते "ध"चाही घातलेल्या काजळाने

दाह विरहाचा असा की, वाटले उध्वस्त झालो
पोसले प्रेमांकुरांना आठवांच्या ओघळाने

भावना उद्रेक अपुला का जगाला दाखवावा?
दु:ख का होते कमी ते चेहर्‍यावर गोंदल्याने?

कौल अपशकुनी मिळाला, श्वान रडता कळवळोनी
दोष इतरा, आपुल्यावर भरवसा ना राहिल्याने

भावनांचा कोंडमारा भोगतो जो तोच जाणे
केवढा तो त्रास होतो! नाक साधे चोंदल्याने

आठरा अध्याय गीतेचे मुखोद्गत जाहल्यावर
प्राप्त कसले ज्ञान होते? घोकल्या पाठांतराने

साक्ष इतिहासात मिळते, राज्यकर्ते लाख बदलो
फायदा रयतेस नसतो कोणत्या सत्तांतराने


सागराची लाट तू "निशिकांत" हो विक्राळ इतकी!
आसर्‍यासाठी फिरावे घेत धसका कातळाने


निशिकांत देशपांडे. मो.क्र. ९८९०७ ९९०२३
E Mail---nishides1944@yahoo.com