साल सरलेले, कहाणी ओघळाची
ना कुणाला आस आहे पाडव्याची
तू न दोषी, योजना ही प्राक्तनाची
मी गुलामी पत्करावी आठवाची
दार केले बंद मी जेंव्हा मनाचे
आत दिसली खिन्नता सार्या जगाची
वास्तवाच्या विस्तवानी पोळलेले
मागती स्वप्ने जराशी गारव्याची
बिल्डरांचा राबता दिसता जरासा
वाढते कळ डोंगराच्या काळजाची
बाण घुसता पारधी जल्लोषले पण
पाहिली तडफड कुणी ना सावजाची
संकटाचा काळ नसतो अवकृपेचा
सावळा घेतो परिक्षा माणसाची
सुरकुत्या पाहून का अंदाज करता?
भूतकाळी लाट होतो सागराची
भाववश "निशिकांत" होणे सोड आता
निर्विकारी शीक शैली कातळाची
निशिकांत देशपांडे. मो.क्र. ९८९०७ ९९०२३
E Mail--- nishides1944@yahoo.com
