ओळखाया लागलो

संकटांच्या मी मुळांशी शोध घ्याया लागलो
आपुल्यांच्या मनसुब्यांना ऑळखाया लागलो

अंधश्रध्दा पाळणारे लोक लाखो जमवुनी
ज्ञान जे नाही मला ते पाजळाया लागलो

कोणता देतोस पत्ता, राहसी देवा कुठे?
तू जरी नसतोस, मूर्ती मी पुजाया लागलो

गाज होतो सागराची, तर त्सुनामीही कधी
वयपरत्वे मी कपातच वादळाया लागलो

सभ्यतेचा फाटला बुरखा, तसा वेशीवरी
इभ्रतीच्या लक्तरांना वाळवाया लागलो

वर्तमानी खाक होता, शोधण्या हिरवळ जरा
बालपणच्या आठवांना चाळवाया लागलो

अश्वमेधाला निघाले थाट पापाचा किती!
पुण्यसंचय व्यर्थ केला, हळहळाया लागलो

काळजावर कोरलेले नाव का मिटते कधी?
वाहते जखमी उसासे जोजवाया लागलो

बेरका "निशिकांत" हल्ली ईश चरणी लीन का?
संकटी देवास स्मरुनी, आळवाया लागलो


निशिकांत देशपांडे. मो. क्र.९८९०७ ९९०२३
E Mail--- nishides1944@yahoo.com

मळभ हे हटावे

किती अन् कसे मी खुलासे करावे?
कधी संशयाचे मळभ हे हटावे ?

सदाचार हा शाप झाला जगी या
दुराचार उ:शाप आहे म्हणावे

"जगी सर्वसूखी असा कोण आहे"
धरायास मृगजळ तरी का पळावे?

घरे मोठमोठी, मने त्यात छोटी
मनाचे रितेपण कसे घालवावे?

असे नागडा एक, दुसरा दिगंबर
कुणी इज्जतीला कुणाच्या जपावे?

जरी शक्यता पाय घसरावयाची
तरी चालणे भाग, ध्यानी धरावे

अधी माळ घालायच्या विठ्ठलाची
कसे आवरावे मनाला, शिकावे

महाभारताचा जरी काळ गेला
इथे कौरवाचेच शासन असावे

जुने दु:ख "निशिकांत" विसरून जावे
कढीला शिळ्या का पुन्हा तापवावे?


निशिकांत देशपांडे. मो. क्र. ९८९०७ ९९०२३
E Mail--- nishides1944@yahoo.com

आक्रंदते अता मी

भिंतीत चार घरच्या आक्रंदते अता मी
माझा परीघ थोडा रुंदावते अता मी

मी चौकटीत जगले, पदरात काय पडले?
रूढी परंपरांना लाथाडते अता मी

उध्दार व्हावयाला राघव हवा कशाला?
माझ्या भविष्यरेषा आकारते अता मी

आवाज दाबलेला आहे तरी परंतू
मौनासवेच माझ्या संवादते अता मी

कोठे सराव होता अपुल्यात कौतुकाचा?
मिळता सहानभूती गंधाळते अता मी

नाही रुची कुणाला दु:खास ऐकण्याची
हास्यात बेगडाच्या हिंदोळते अता मी

गझलेतल्या स्त्रियांचा संबंध वास्तवाशी
नसतो कधी समजता, आक्रोशते अता मी

दिसता प्रभात किरणे, अंधारल्या मनाला
आशा धुमारते अन् उल्हासते अता मी

"निशिकांत" ऐकली का दुखरी व्यथा स्त्रियांची?
म्हणतेय स्त्री जगाला विद्रोहते अता मी"


निशिकांत देशपांडे. मो. क्र. ९८९०७ ९९०२३
E Mail--- nishides1944@yahoo.com

तो का दुरून गेला?

ओठात गीत ज्याचे, तो का दुरून गेला?
गुंत्यात आठवांच्या मज गुंतवून गेला

होती जरी निवडली, निर्मोह वाट जगण्या
आला वसंतरूपे अन् मंतरून गेला

दु:खे हजार तुमची, साकीस काय त्याचे?
धंदा झकास झाला, जो तो पिऊन गेला

पैलू विभिन्न होते माझ्या तिच्या मनाचे
समजून एकमेका, रस्ता सरून गेला

लपतोय का निखारा? राखेस पांघरोनी
का धगधगावयाला तो घाबरून गेला?

खोटेपणात ज्याचे आव्हान जिंकलेल्या
पाहून मणसांना कोल्हा पळून गेला

रुद्राक्ष घातलेला, भगव्यात नांदणारा
भोगी, स्त्रियांस भोळ्या, गोपी करून गेला

मज सावली मिळाली, अन् बोनसाय झालो
आलेख वाढण्याचा पिग्मी बनून गेला

गंगेस साफ करण्या, चांडाळ धावल्याने
"निशिकांत" पाप धूण्या, पुण्ये करून गेला


निशिकांत देशपांडे. मो. क्र. ९८९०७ ९९०२३
E Mail--- nishides1944@yahoo.com

चूक भयंकर

आक्रोशाला तळातल्यांच्या कमी लेखणे चूक भयंकर
त्यातच असते महान शक्ती समूळ करण्याची सत्तांतर

आम जनांचे बजेट आहे असे सांगती जरी निरंतर
विकास संधी श्रीमंताना, गरिबांवर असते गंडांतर

सभोवताली कुठे दिसेना कुणीच नेता असा धुरंदर
स्वप्नांसाठी रयतेच्या जो झटेल आणाया स्थित्त्यंतर

खूप ऐकले प्रजाजनांनी भाषणातुनी नेतृत्वाला
आस मनाला, वचनपूर्तिचे कधी तरी यावे प्रत्त्यंतर

काम कमी अन् सदैव गोंधळ घालाया नेत्यांना संसद
आमजनांचे प्रश्न घेउनी धरणे द्याया जंतर मंतर

जरी नायिका, नायक यांचे महत्व असते कथानकाला
रंग भराया लागतात ना! छोट्याशा भूमिका अवांतर

चालत होतो बरोबरीने, मनमुटाव ना कधीच झाला
रेल्वेपटरीसमान सोबत, भेटीविन चाललो समांतर

सुशिक्षितांची मूळ समस्या, व्यवहाराविन हुशार सारे
आपसातल्या प्रश्नांसाठी नसे तोडगा फक्त मतांतर

हार कशी "निशिकांत" मनली? लढता लढता वेदनांसवे
प्राक्तनातल्या चित्रपटाचे अजून झाले ना मध्यंतर


निशिकांत देशपांडे. मो.क्र. ९८९०७ ९९०२३
E Mail--- nishides1944@yahoo.com