मळभ हे हटावे

किती अन् कसे मी खुलासे करावे?
कधी संशयाचे मळभ हे हटावे ?

सदाचार हा शाप झाला जगी या
दुराचार उ:शाप आहे म्हणावे

"जगी सर्वसूखी असा कोण आहे"
धरायास मृगजळ तरी का पळावे?

घरे मोठमोठी, मने त्यात छोटी
मनाचे रितेपण कसे घालवावे?

असे नागडा एक, दुसरा दिगंबर
कुणी इज्जतीला कुणाच्या जपावे?

जरी शक्यता पाय घसरावयाची
तरी चालणे भाग, ध्यानी धरावे

अधी माळ घालायच्या विठ्ठलाची
कसे आवरावे मनाला, शिकावे

महाभारताचा जरी काळ गेला
इथे कौरवाचेच शासन असावे

जुने दु:ख "निशिकांत" विसरून जावे
कढीला शिळ्या का पुन्हा तापवावे?


निशिकांत देशपांडे. मो. क्र. ९८९०७ ९९०२३
E Mail--- nishides1944@yahoo.com