थोडा सैलसा झाला

सरावाने उसास्यांशी घरोबा छानसा झाला
गळ्याला लागलेला काच थोडा सैलसा झाला

कहाणी कातळाची ऐकता दुबळ्या मनालाही
लढा लाटांसवे जिंकावयाचा भरवसा झाला

न आहे भाट अंधारा! तुझे मी गीत का गावे?
तुझे अधिपत्य उखडाया, पुरेसा कवडसा झाला

धरेला चिंबवायाचे तुझे कर्तव्य असुनीही
स्वतःचा श्रावणा रे! शुष्कलेला का घसा झाला?

न मिळणारीच असते गोष्ट इतकी का महत्वाची?
कदाचित देव म्हणुनी माणसांची लालसा झाला

हजारो जन्मती मरती तसा मी जन्मलो मेलो
स्मशानी का उगा म्हणता "असा झाला तसा झाला"

जरी अंधार पांघरला कराया पातके लपुनी
लपावे मी कुठे? माझ्या मनाचा आरसा झाला

तुझा लहरीपणा पाहून बळिराजा निराशेने
दिशेने मृगजळाच्या चालता तो, पावसा! झाला

लिलावाने विकायाचे जरी "निशिकांत"ला ठरले
न बोली लावली कोणी, तरी सौदा कसा झाला?


निशिकांत देशपांडे. मो.क्र. ९८९०७ ९९०२३
E Mail--- nishides1944@yahoo.com