विश्व नगारा पिटते आहे

शुध्द हवेचीही कमतरता जरी मानवा छळते आहे
प्रगती केली खूप म्हणोनी विश्व नगारा पिटते आहे

धो धो बरसत पैसा येता भाव वाढती कैक पटीने
असे असोनी तुझे माणसा मुल्य रोज का घटते आहे?

प्रेम जाहले कालबाह्य अन् करार करुनी नांदतात पण
कैफ उतरता तारुण्याचा, कुणी न अपुले उरते आहे

जरी गोंदले तनामनावर संस्कारांचे चित्र गोजिरे
भोगवाद मातला एवढा, चित्त किती भरकटते आहे

करता तप मी देव पावला काय हवे ते माग म्हणाला
तपोभंग करण्यास मेनका ना आल्याचे सलते आहे

न्यायदेवता जरी आंधळी उभी तराजू धरून हाती
कसा निवाडा! कुण्या नटाला माप दिले का झुकते आहे?

अंधाराचा किती दबदबा! लपून बसला सूर्य बिचारा
कुणा न उरली जगी सावली, पूर्व दिशा मावळते आहे

चंगळवादी जीवनशैली नात्यांना ना जागा उरली
उपयोगी मी किती कुणाला? हीच कसोटी ठरते आहे

असा कसा "निशिकांत" जाहला उदासवाणा तुझा चेहरा?
थाट बघोनी काळोखाचा, ज्योत मनीची विझते आहे


निशिकांत देशपांडे. मो.क्र. ९८९०७ ९९०२३
E Mail--- nishides1944@yahoo.com