कोरीव चेहरा तव घडवून कोण गेले?
नक्षत्र तेज वदनी मढवून कोण गेले?
डोळे तुझे नशिले अंदाजही नशिला
बेहोष धुंद डोही बुडवून कोण गेले?
ते धुंद हास्य ओठी, खैरात मज नशेची
मायूस आज का तू? चिडवून कोण गेले?
पहून लाल गाली, ओलेपणा दवांचा
शंका मनात, तुजला रडवून कोण गेले?
कानी हवा म्हणाली, येशील तू पहाटे
थबकून का उभी तू? अडवून कोण गेले?
गेले कुठे सदाचे? लडिवाळ बोलणे ते!
मित भाषणी असावे, पढवून कोण गेले?
स्वप्ने बघून जगणे शिकलो तुझ्यामुळे मी
झोपेस पंख लाउन, उडवून कोण गेले?
नि:शब्द ओठ होते, डोळ्यात भाव सारे
उद्वेग भावनांचा दडवून कोण गेले?
जाणून पायरी मी जगलो जगी खुषीने
झाडावरी चण्यांच्या चढवून कोण गेले?
"निशिकांत" काल येथे होती फुले सुगंधी
आता सुकून पडली, तुडवून कोण गेले?
निशिकांत देशपांडे. मो.क्र. ९८९०७ ९९०२३
E Mail--- nishides1944@yahoo.com
