सांगून आलो

 

निर्जळी आहे असे सांगून आलो

अन् गरीबीला जरा झाकून आलो

व्हायचे ते होत असते पण तरीही

भिक्षुकांना कुंडली दावून आलो

यत्न करुनी गावले नाही कुठेही

शोध क्षितिजाचा जगी घेऊन आलो

शांत जगणे जाहले कंटाळवाणे

आरशासी शेवटी भांडून आलो

ना दिसे ईमान कोठे औषधाला

राज्यकर्त्यांशी जरा जुळवून आलो

चालकांना मंदिरांच्या, मस्जिदीच्या

दे सुबुध्दी नेहमी प्रार्थून आलो

ध्यास होता पाडसांना पाहण्याचा

भेटलो अन् आतुनी उसवून आलो

का असे मृत्त्यूस भीता पामरांनो?

परतुनी जाण्यास तर जन्मून आलो

भक्तिमार्गी काय तू " निशिकांत" केले?

विठ्ठलाशी तार मी जुळवून आलो

निशिकांत देशपांडे, पुणे.

मो. क्र. ९८९०७ ९९०२३

वृत्त--मंजुघोषा

लगावली--गालगागाX३

ओझरते बघताना

 

यत्न करोनी मनास भक्ती मार्गाला नेताना

शहारलो पण आज सखीला ओझरते बघताना

नकोनकोशी जरी वाटली जन्म तिचा होताना

बांध फुटे का अश्रूंचा ती सासरास निघताना?

वेग वाढतो सायंकाळी घराकडे जाताना

मूर्तिमंत मी प्रेम पाहिले धेनू हंबरताना

अंगत पंगत सुखदु:खाची केली होती आम्ही

झरझरतो का श्रावण नेत्री सारे आठवताना?

हात टेकले देवा पुढती नतमस्तकही झालो

जन्म संपला! कधी न दिसला प्रसन्न तो होताना

सुद्राक्षाची  माळ घतली, टिळा लावला भाळी

पुण्य कशाचे! खळगी भरली ढोंग सोंग करताना

असाल मोठे! बडेजाव का उगा मिरवशी मित्रा? 

दिवाही तसा मोठा होतो, क्षणेक मालवताना

मुल्यांकनही होते कोठे अंतरजालावरती?

फेसबुकवरी फक्त अंगठे! थकतो मी बघताना

डोळे का "निशिकांत" जाहले ओले अंत क्षणाला?

हास्य असू दे ओठावरती पुनर्जन्म घेताना

निशिकांत देशपांडे, पुणे.

मो. नं. ९८९०७ ९९०२३

वृत्त--लवंगलता

मात्रा--८+८+८+४=२८