ध्येय मार्गी चालताना

ध्येय मार्गी चालताना पाय भरकटले किती?
हारल्याच्या भावनेने श्वास गुदमरले किती?

पेटल्या होत्या मशाली, प्रश्न धगधगले किती?
नांदते मरगळ अताशा गाव धुरकटले किती?

तो म्हणे मी बाल आहे मामुली शिक्षाच द्या
श्वापदाने त्या कळीला काल कुस्करले किती?###

ताण, वेगाचा मिळाला नवपिढीला शाप अन्
पस्तिशीआधीच दिसती गाल सुरकुतले किती?

मी वसंताचे जरी का स्वप्न नाही पाहिले
लागता चाहुल तुझी मन मस्त शिरशिरले किती?

तू निघाल्यावर, हसोनी, जा म्हणालो मी तुला
दार लाउन घेतल्यावर नेत्र घळघळले किती?

श्वास गुदमरतो असा का रोग नसुनी कोणता?
आठवांनी बघ गळ्याला घट्ट करकचले किती?

सोसतो मी तू दिलेल्या खोल जखमा एवढ्या !
भानही नसते नव्याने आज खरचटले किती

संग का "निशिकांत" केला तू असंगाशी असा?
आरसा सांगेल काळे तोंड बरबटले किती


### दिल्लीतल्या बलात्कार कांडावर आधरित प्रासंगिक शेर

निशिकांत देशपांडे मो.क्र. ९८९०७ ९९०२३
E Mail-- nishides1944@yahoo.com