जीवन उगाच वाया

(अनौरस, अनाथ बाळाचा आक्रोश)

सांगा जगी कुठे हो मजला मिळेल माया ?
शोधात काळ गेला जीवन उगाच वाया

काटेकुटे तुडवले जंगल समीप केले
पतझड उजाड सारे नव्हती कुठेच छाया

जन्मास हाय आलो आई मला असावी
पैदा अनाथ झालो बापाविना जगाया

डोळे हळू उघडले मातेस पाहण्याला
अंधार आत आला बाहूत बाळ घ्याया

मजला कळून आले आईस दोष कैसा?
मजबूर ती असावी गमवून प्रीय राया

सटवाईलाच आहे माझा सवाल साधा
तलवार घेतली का भाग्यास तू लिहाया ?

माझ्याच असवांनी न्हाऊन मी निघालो
पाणी हवे कशाला? प्रेतास स्नान द्याया

का व्यर्थ भांडता हो कोणी कफन शिवावे?
दगडी जगास सांगा श्वानास प्रेत  द्याया

"निशिकांत" पीक आले जगती जनावरांचे
एकास गोद घे तू डोळे हळू पुसाया

निशिकांत देशपांडे मो.म्र. ९८९०७ ९९०२३
E Mail--- nishides1944@yahoo.com

का तेच झाले?

शेवटी होऊ नये का तेच झाले?
गारदी देण्यास खांदा फक्त आले

चेहर्‍याच्या आड मी डोकावलो न
वाटले जे आपुले, परके निघाले

फक्त सदरे घातल्याने साणसांचे
मान मिळतो श्वापदांना, हे कळाले

शांतता समितीवरी अध्यक्ष केले
नेमके दंग्यात ज्याचे घर जळाले

राष्ट्रद्रोही अन् जिहाद्यांचाच पुळका
अन् हुतात्मे विस्मृतीमध्ये बुडाले

पाहिला पोलीसखाक्या अन् दरारा
गुंड त्यांचे दोस्त, पीडित धुम पळाले

लोकशाही भोगली मनसोक्त लुटली
लूट घेउन सभ्य स्वीडनला उडाले

प्यायला पाणी नसे, हाती जनांच्या
घोषणांनी फक्त भरले रिक्त प्याले

चांगल्या "निशिकांत" गोष्टी सांगता मी
का मला सारेच बुरसटला म्हणाले?


निशिकांत देशपांडे मो.क्र. ९८९०७ ९९०२३
E Mail--- nishides1944@yahoo.com

आपण शांत असते

आपण शांत असते

वादळे उठवून आपण शांत असते
चित्त माझे का अशी बेचैन करते?

लाभला लडिवाळ मुखडा जीवघेणा
हासते मिष्किल, कधी लटकेच रुसते

जीव ओवाळून टाकावा जिच्यावर
एवढी ती आपुल्या तोर्‍यात दिसते

मेनका ती पूर्वजन्मीची असावी
भंगण्या तप आजही ती गोड हसते

गर्क असते आपणातच एवढी की
आरशामध्ये स्वतःला फक्त बघते

राहते ती बंद कोषी एकटी अन्
व्यक्त थोडी, जास्त ती अव्यक्त जगते

रंगला "निशिकांत" सौंदर्यात वेडा
स्वप्न सरल्यावर तिचे अस्तित्व विरते

निशिकांत देशपांडे मो.क्र. ९८९०७ ९९०२३

अडचणीचा जाहलो

कोपर्‍यालाही घराच्या अडचणीचा जाहलो
मीच माझ्या अंगणाला अडगळीचा जाहलो

रेशमांचे बंध होते कैक विणले जीवनी
लुप्त सारे, एक धागा उसवणीचा जाहलो

जिंकली मी कैक शिखरे, सांजवेळी पण अता
मी चढावाचा प्रवासी उतरणीचा जाहलो

सांत्वने देता मला का? सावरा अपुले जिणे
का विषय ढोंगी जनांच्या हळहळीचा जाहलो

आत्मवृत्तातील पाने घेतली लिहिण्यास मी
एक मी इतिहास आता वळचणीचा जाहलो

भक्त होतो ईश्वराचा ना कुणी याचक तरी
मजबुरीने दास आता विनवणीचा जाहलो

कर्मकांडाने निराशा लाभली अन् , कार्यकर्ता
अंधश्रध्देच्या विरोधी चळवळीचा जाहलो

गुंतलो इतका प्रपंची, आस मुक्तीची वृथा
जन्म मरणाचा प्रवासी दगदगीचा जाहलो

आरसा "निशिकांत" सांगे मावळाया लागले
अंत दिसता, ओलसर मी पापणीचा जाहलो


निशिकांत देशपांडे मो.क्र. ९८९०७ ९९०२३
E Mail--  nishides1944@yahoo.com