तिचा चेहरा

प्रभात किरणे पांघरणारा तिचा चेहरा
दवबिंदुंनी ओघळणारा तिचा चेहरा

सौंदर्याचा शोध संपतो तिला पाहता
दिलदारांना सुखावणारा तिचा चेहरा

वेळ जाहली तरी सख्याची चाहुल नाही
दहा दिशांना भिरभिरणारा तिचा चेहरा

तिला बघावे विसरुन जावे असे न घडते
अंतःकरणी घुटमळणारा तिचा चेहरा

नेत्र बोलके तिचे एवढे, शब्द कशाला?
मीत मनीचे गुणगुणणारा तिचा चेहरा

हसताना ती, टपटप गळती असंख्य मोती
मोत्यांनाही लाजवणारा तिचा चेहरा

शुक्रतारका नभांगणीची मी न पहिली
मला आवडे लखलखणारा तिचा चेहरा

विश्वामित्रा नकोस वेड्या बसू तपाला
धोका आहे वावरणारा तिचा चेहरा

देता गजरा "निशिकांता"ने मोहरली ती
निशिगंधाने दरवळणारा तिचा चेहरा

"निशिकांता" तिज व्यक्त व्हावया शब्द फुटेना
ओंजळीत घे थरथरणारा तिचा चेहरा


निशिकांत देशपांडे मो.क्र. ९८९०७ ९९०२३
E Mail--- nishides1944@yahoo.com