मी सरणारा नाही

खेळ जीवना खेळ तुझे , मी घाबरणारा नाही
संकटातही उरेन पुरुनी, मी सरणारा नाही

खाचा, खळगे, अंथर काटे जीवनमार्गी माझ्या
ध्येयदिशेने चालत असतो, मी थकणारा नाही

आयुष्याचे ओझे पेलत आनंदाने जगतो
भार तुझा तू टाक जीवना, मी झुकणारा नाही

घाव छनीचे मीच मारतो भाग्य घडवण्या माझे
जन्मकुंडली, ग्रहतार्‍यांना मी बघणारा नाही

गाज भयंकर, असो त्सुनामी सागरास मी भिडतो
घेत काळजी किनार्‍यावरी वावरणारा नाही

मैफिल माझी, गायन माझे, सूर, सुरावट माझी
साथ द्यावया सारंगी मी वाजवणारा नाही

शाश्वत असती फक्त वेदना, मैत्री त्यांच्यासंगे
क्षणभंगुरशा सुखात केंव्हा मी रमणारा नाही

तू पारांगत जरी जीवना द्यूत खेळण्यामधला
मीच जिंकतो, कधी हारता डगमगणारा नाही

"निशिकांता"ची जिद्द केवढी! पुढे पुढे जाण्याची
समोरच्याला ठेच, शहाणा मी बनणारा नाही


निशिकांत देशपांडे. मो.क्र. ९८९०७ ९९०२३
E Mail--- nishides1944@yahoo.com