पडझड झाली

बघता बघता आयुष्याची पडझड झाली
उरलेली का वाट एवढी अवघड झाली?

पांथस्थांचा वृक्षतळीचा वावर सरला
जशी हरवली छाया जेंव्हा पतझड झाली

भेट न होता श्रावण गेले कैक कोरडे
आठवणींची पुरचुंडीही अवजड झाली

शब्द पडू तू दिलास नव्हता खाली केंव्हा
कुजबुज माझी आज तुला का बडबड झाली?

सोडलीस तू साथ होवुनी निर्विकार, पण
माझ्या ह्रदयी ठोके चुकले, धडधड झाली

नको उधारी, नकोच आता हिशोब कसले
सैल केवढी आपुल्यातली सांगड झाली !

तारेवरची कसरत असते जीवन जगणे
पाय कुठे अन् कसा घसरला ! गडबड झाली

नेत्यासम ढग करून गेले फक्त वल्गना
टिपूस ना पाण्याचा, नुसती गडगड झाली

घरचे सोडुन, नवीन कुरणे चरता चरता
"निशिकांता"च्या आयुष्याची परवड झाली


निशिकांत देशपांडे. मो.क्र. ९८९०७ ९९०२३
E Mail--- nishides1944@yahoo.com