अशी रात फिरायासाठी---( तरही )

दे ऋतू एक, शहार्‍यांत लपायासाठी
हा असा चंद्र, अशी रात फिरायासाठी

चांदण्या रोज किती वेळ सख्या मोजू मी ?
दे तुझी झोप, तुझे स्वप्न बघायासाठी

एकटी वाट कशी पार करू वळणांची ?
मागते साथ, तुझा हात जगायासाठी

लागला ध्यास, जगायास पुढे क्षितिजाच्या
पंख दे आज सख्या, ऊंच उडायासाठी

गुंफली वीण किती घाट्ट! सख्या नात्याची
सातही जन्म, तुझी मीच असायासाठी

झाकुनी दु:ख, उसास्यांस हसू पांघरले
जीवना! रंग तुझे मस्त दिसायासाठी

प्रेतयात्रेत स्वतःच्याच निघायाआधी
खोदली मीच कबर खोल पुरायासाठी


निशिकांत देशपांडे. मो.क्र. ९८९०७ ९९०२३