उसासा खोल दबलेला
कुणाला ना समजलेला
जरी हा अंक शेवटचा
तरी ना खेळ सरलेला
दिसाया स्वच्छ वर पाणी
तळाशी गाळ लपलेला
मनोरा ताठ तेंव्हाचा
पिसाचा आज झुकलेला
प्रभूला वाहिली सुमने
कराला गंध उरलेला
उशाला घेउनी धोंडा
सुखी तो रंक निजलेला
सुशासन आणण्या, ऐका
जरा आवाज शिणलेला
वड्याचे तेल वांग्यावर
जगी हा न्याय ठरलेला
"मृतात्मा"का उगा म्हणता?
अमर तो मुक्त असलेला
किती अवसान उसने ते!
असोनी आत खचलेला
कुणाला काय हो त्याचे?
जरी "निशिकांत" सरलेला
निशिकांत देशपांडे, पुणे.
मो. क्र. ९८९०७ ९९०२३
वृत्त--महामाया
लगावली--लगागागा X ३
No comments:
Post a Comment