भोगलेले कालचे
राहिले सांगायचे
राहतो माझ्यात मी
मग कुणा बोलायचे?
पाप नांदे आत पण
प्रवचनी शिकवायचे
का उद्याची काळजी?
आज आनंदायचे
स्वप्न पडते नेहमी
पाय का घसरायचे?
दे हरी बाजेवरी
कष्ट का उपसायचे?
श्वास घेतो सोडतो
नाव जीवन द्यायचे
चार खांदे, न्यावया
मीच का शोधायचे?
आज गेला चांगला
का लगे हुरळायचे?
वादळांना का कधी
कातळाने भ्यायचे?
आसवे "निशिकांत' का?
शीक तू लपवायचे
निशिकांत देशपांडे, पुणे.
मो. क्र. ९८९०७ ९९०२३
वृत्त--कादंबरी
लगावली--गालगागा गालगा
No comments:
Post a Comment