हसणे हसतो रडणे रडतो गजला मधुनी
ओघळणारे अश्रू पुसतो गजला मधुनी
सारे माझे मी सा-यांचा मान्य जरी मज
माझ्या पासुन मीच हरवतो गजला मधुनी
माझे गाणे वा रडगाणे माझे आहे
मूकपणाने मी गुणगुणतो गजला मधुनी
दार जरी मज बंद जगाचे, देवा घरच्या
उंबरठ्यावर मी घुटमळतो गजला मधुनी
मान्य मला आंधार पसरला चार दिशांना
यत्न कवडसा होण्या करतो गजला मधुनी
ओंगळवाण्या श्रीमंतीची हाव कशाला?
गरिबीसंगे लिलया जुडतो गजला मधुनी
चंदन होउन जगती जे जे दुस-यासाठी
गंध तयांचा मी पसरवतो गजला मधुनी
काळोखी जे नेते करिती काळे धंदे
ढोल नगारे मीच बडवतो गजला मधुनी
गजला फुलल्या गजला हसल्या "निशिकान्ताच्या"
स्वर्ग सुखाने मी गुदमरतो गजला मधुनी
निशिकान्त देशपांडे मो.नं. 98907 99023
E Mail nishides1944@yahoo.com
No comments:
Post a Comment