निवासी मंदिराचा

देव आहे जो निवासी मंदिराचा
थांगपत्ता त्यास नाही या जगाचा

ऐकुनी आकांत फसल्या सावजाचा
घट्ट झाला पीळ हळव्या काळजाचा

कोपरा द्या एक वृध्दांना घराचा
दावता का मार्ग त्यांना आश्रमाचा

व्हायचे होईल, अज्ञानी जगू द्या
का इशारा आज देता वादळाचा?

"ब्रह्म सत्त्या जगत मिथ्या" जर खरे हे
ध्यास का सर्वास असतो मृगजळाचा?

धन्य देवा, जीवनी भेगाळलेल्या
हक्क आहे पापण्या ओलावण्याचा

मीच पत्ता का असा पुसतोय माझा?
कोण दुसरा शोध घेइल पामराचा?

सोडण्या मागे ठसे पुढच्या पिढ्यांना
शोध माझ्या पावलांना कातळाचा

तोडता "निशिकांत"ने नाते स्वतःशी
"मी" न उरला, जाहला तो विठ्ठ्लाचा


निशिकांत देशपांडे.मो.क्र. ९८९०७ ९९०२३
E Mail--- nishides1944@yahoo.com