यक्षप्रश्नांनी सदा वैतागलेला
उत्तरांचा मार्ग नाही गावलेला
पापण्या भिजतात तेंव्हा नेमका का?
कोपरा असतो मनी भेगाळलेला
लिप्त संसारी तरी वारीत जाता
पाहिला प्रत्त्येकजण भक्ताळलेला
कोणते घरटे अता आबाद आहे?
लेकुरे उडताच जो तो संपलेला
जो विटेवर कैद आहे, संकटी तो
पाहिला मदतीस नाही धावलेला
हालवाया गदगदा सिंहासनाला
पाहिजे जनक्षोभ धगधग पेटलेला
का दुरुत्तर द्यावयाचे उत्तराला?
मी निरुत्तर मार्ग आहे शोधलेला
गौरवान्वित ईशमाथीच्या फुलांना
शाप "व्हा निर्माल्य"आहे लाभलेला
का असा "निशिकांत"तू भयभीत जगसी?
ताक फुंकी, दूध केंव्हा पोळलेला
निशिकांत देशपांडे. मो.क्र. ९८९०७ ९९०२३
No comments:
Post a Comment