डोकावुन आत बघावे

"हे झाले असे कसे? चे विश्लेषण नीट करावे
का दोष उगा कोणाला? डोकावुन आत बघावे

ही आयुष्याची वणवण, संपेल कधी का देवा?
श्वासांना गुदमरणार्‍या, मृत्यूने कवटाळावे

नवजात शिशूचे रडणे, ऐकून हास्य फुलल्यावर
मुलगाच जन्मला आहे, ना मुलगी हे समजावे

भक्तीने दर्शन घ्याया, जातो मी जेंव्हा जेंव्हा
दिसतात मंदिरी याचक, भक्तांस कुठे शोधावे?

हे पक्षिणीस केंव्हाही सांगावे लागत नाही
पोटाला चिमटा घेवुन, बाळास घास भरवावे

आनंदी क्षणही देती, का आठव करकचणारे?
सुखदु:खापैकी देवा, नेमके काय मागावे?

ना बैठक, बोलाचाली लग्ने ठरवायासाठी
दोघातच ठरते सारे, अन् आम्ही हुंकारावे

घेताना ऊंच भरारी, सारेच खुशी अनुभवती
पण एकएकटे तेथे, हे त्यांना ज्ञात नसावे

"निशिकांत" विठूचा महिमा, ना कळतो अज्ञान्यांना
अंतरी ज्योत तेवाया, वारीत हरवुनी जावे


निशिकांत देशपांडे. मो.क्र. ९८९०७ ९९०२३