खूप आहे

बाळ बाळंतीणही सुखरूप आहे
अन् दिले जन्मू मुलीला खूप आहे

माय खचलेली दिसे वृध्दाश्रमीची
लेकरांचे पण किती अप्रूप आहे!

चेहर्‍यावर चेहरे फसवावयाला
जाणतो मी आतला विद्रूप आहे

का उगा जुळवीत बसता पत्रिकांना?
पण बघा की तो तिला अनुरूप आहे

जीवनाची सांजही मैफिल कराया
होउनी तल्लीन गातो भूप आहे **

वेदना सहचारिणी मानून घ्यावी
तिजसवे नांदायचे गुपचूप आहे

ठेच खाल्ल्यावर कसा "निशिकांत" नास्तिक
भक्ति मार्गी जाहला तद्रूप आहे

**भूप, पूर्व रात्री गायला जाणारा राग


निशिकांत देशपांडे. मो.क्र. ९८९०७ ९९०२३