का नभाला पारखे त्यांना करावे?

पाखरांचे पंख का कोणी खुडावे?
का नभाला पारखे त्यांना करावे?

वादळांना एवढे का घाबरावे?
शांतता असते चिंरंजिव ओळखावे

पाप करुनी शरण जाता देव पावे
पुण्यवंतांच्याकडे कोणी बघावे?

न्याय का तक्रारदारांनाच मिळतो?
मूक अश्रू रामशास्त्र्यांनी पुसावे

संसदेची एकदा व्हावी समिक्षा
कोण आले निवडुनी चरण्यास रावे?

जिंकतो तो नेहमी असतो सिकंदर
हारणार्‍यांना कधी कोणी न पावे

वादळाचा शांततेशी तह न होतो
पक्षबदलूंचे इथे घरटे नसावे

याचना करतो दयेची दोष नसता
जैन नसुनी चांगले ते घेत जावे

चेहरा प्रतिबिंब असतो अंतराचा
मुखवटे "निशिकांत" का मग पांघरावे?


निशिकांत देशपांडे. मो.क्र. ९८९०७ ९९०२३