कुणीच नाही बोलायाला
मनोवेदना सांगायाला
वेळ लागतो मुखवट्यातले
कोण कसे हे समजायाला
दोष नको कपड्यास तोकड्या
पाय, मुलांनो घसरायाला
देव नांदतो जरी अंतरी
ज्ञान लागते जाणायाला
ऊंच ऊंच इमल्यात राहती
खुजी माणसे नांदायाला
क्रत्रिम ढग का उगा पेरता?
मोर लागतिल नाचायाला
कोण आपुले? उत्तर देण्या
खूप लागते शोधायाला
शंभर कोटी लाच दरमहा
भूक लागली वाढायाला
क्वारंटाइन अपुल्या मधुनी
जरा मोकळे वाटायाला
जरी मुखवटा चेहर्यावरी
मास्क लागतो बांधायाला
आवडते "निशिकांत"तुला का?
स्वतःपासुनी हरवायाला
निशिकांत देशपांडे, पुणे.
मो. क्र. ९८९०७ ९९०२३
वृत्त---पादाकुलक
मात्रा---प्रत्येक ओळीत...१६
No comments:
Post a Comment