चालतो मी

खेकड्याची चाल आता चालतो मी
जो पुढे जाईल त्याला ओढतो मी

सागराच्या तांडवाला टाळतो मी
शोधण्या मोती तळाला राहतो मी

धर्मशास्त्रातील तत्वे वाचलेली
वागताना बासनी गुंडाळतो मी

शोधली पळवाट मांसाहार खाण्या
जानवे खुंटीस तेंव्हा टांगतो मी

कोण मेले कोण जळते काय त्याचे !
भाकर्‍यांना त्या चितेवर भाजतो मी

पाहिले अन् भोगले अन्याय इतके !
फक्त डोळेझाक करणे जाणतो मी

पारध्यांना हूल देवुन वाचलेल्या
सावजांच्या धडधडीला ऐकतो मी

जीत सत्त्याचीच होते शेवटी पण
मालिकांतुन दुष्ट खोटा गाजतो मी

दर्शनी "निशिकांत" कुस्ती खेळसी का?
वास्तवाला भीत दर्पण फोडतो मी

निशिकांत देशपांडे मो. क्र. ९८९०७ ९९०२३
E Mail-- nishides1944@yahoo.com