दे हात, सावरूया

--( सुरेश भटांचा मिसरा आदरणीय भिमराव पंचाळे यांनी तरहीसाठी दिलेला)

(नाही म्हणावयाला आता असे करूया)
विसरून वाद, हाती दे हात, सावरूया

कोरी नवीन पाटी, नाते लिहू नव्याने
नवगीत आळवाया, लय लाघवी धरूया

बघतील लोक याची का काळ्जी करावी?
टाळावयास नजरा रोमांच पांघरूया

होईन तृण पहाटे तू ये दवाप्रमाणे
झुळझुळ हवेत आपण उन्मुक्त थरथरूया

नाजूक काळजाची घेण्यास काळजी चल
नामी उपाय म्हणुनी हळुवार फुंकरूया

गाऊन द्वंद्व गीते, सांगावया कहाणी
रंगीन मैफिलीला धुंदीत मंतरूया

स्वप्ने हवीहवीशी येतील भेटण्याला
रंगीत पाकळ्यांना रस्त्यात अंथरूया

फापट किती पसारा, ह्रदयात आठवांचा
अडगळ अमाप झाली, ठरवून आवरूया

"निशिकांत" कर तयारी आलाय पावसाळा
गंधात मृत्तिकेच्या मनसोक्त मोहरूया


निशिकांत देशपांडे. मो.क्र. ९८९०७ ९९०२३