वार्यासंगे बोलत असतो
निरोप तुजला धाडत असतो
व्यक्त कराया कुणीच नाही
आरशास मी सांगत असतो
वसंतासही परत धाडले
मजेत ग्रिष्मा सोबत असतो
अथांग सागर डोळ्यामधला
बांध घालुनी रोखत असतो
तुझी पैंजणे चाहुल देता
मनोमनी झंकारत असतो
नसे शिकायत नको नकोची
जरी अंतरी उसवत असतो
प्राक्तना तुला हवे तसे कर
भाग्याला मी जिंकत असतो
आठवणींना, शक्य नसोनी
दूर कराया झटकत असतो
सवय लागली "निशिकांता"ला
दुर्गुणावरी भुंकत असतो
निशिकांत देशपांडे, पुणे.
मो. क्र. ९८९०७ ९९०२३
वृत्त--पादाकुलक
मात्रा--८+८=१६
No comments:
Post a Comment