डायरीला मीच माझ्या फाडले
भय कुणी वाचेल याचे संपले
खोल का आयुष्यभर डोकावले?
गाळ जेथे, व्यर्थ मोती शोधले
वापराया लागता मी चेहरे
मी खर्या "मी"लाच होते गाडले
मार्ग धोपट चालतो मी सर्वदा
वाकडे जग चालले तर चालले
नाव होते सातबार्यावर तरी
मालकाचे शेत होते लाटले
का नकोचा ठेवला पडदा असा?
सारल्यावर शेवटी सुख गावले
शांतता भेसूर घरची टोचता
हास्यक्लबला जाउनी ते हासले
प्रेम शाही आठवाया ताज का?
मोगलांचे खानदानी चोचले
वाद होता हे बडे की ते बडे
बिंग जनतेनेच उघडे पाडले
बुद्धिवादी स्वार्थ अपुला पाहती
दुर्जनांचे फावले तर फावले
का उगा "निशिकांत" चर्चा एवढी?
बाष्कळांना ना कुणीही जिंकले
निशिकांत देशपांडे, पुणे.
मो. क्र. ९८९०७ ९९०२३
No comments:
Post a Comment