जगावे का? कशासाठी? अशा प्रश्नात गुरफटलो
मिळाली उत्तरे नाहीत, प्रश्नांसोबती जगलो
उशाला चार स्वप्ने घेउनी मी झोपतो हल्ली
निराळे विश्व आभासी, जिथे हरवून सापडलो
कुणावर जीत मिळवावी, पशूवत भावना असते
म्हणोनी आरशापुढती उभा राहून मी लढलो
कधी काळी पुढार्‍याचा जरा संसर्ग झाल्याने
मनाला प्रश्न पडतो की कशाला व्यर्थ खरकटलो?
किती चौखूर उधळावेस तू आम्हास आयुष्या!
पळालो खूप तरुणाईत, मावळतीत फरपटलो
कधी पाद्री, कधी मुल्ला, कधी झालो जटाधारी
जगा उपदेश केला पण मनी विषयात बरबटलो
उसास्यांना किती अन् केवढे काबूत ठेवावे?
प्रयत्ने झाकताना वेदनांना, आत गुदमरलो
उठाया लागल्यावरती अताशा बोलती गुडघे
सुरू झाली अता उतरण "चला परतून" पुटपुटलो
मनी "निशिकांत"च्या आले, निघावे दूर तप करण्या
कुणी तपंभग करते का? विचारानेच मोहरलो
निशिकांत देशपांडे. मो.क्र. ९८९०७ ९९०२३
