नाराज का झाला?

"रहावे चौकटीच्या आत" भिरकाऊन तत्वाला

जगाया लागल्यावर उंबरा नाराज का झाला?

उद्याची आज का कलीस रे! तरतूद तू वेड्या

उद्याचे सोडुनी मृगजळ, शिकावे आज जगण्याला

नको सांगूस तू थोतांड बाबा प्रवचनामधुनी

कुठे जग चालले आहे, कुठे नेतोस आम्हाला?

म्हणाला मारती धोंडे, तयांना माफ कर देवा

जनाला जे न कळले ते कळाले येशु ख्रिस्ताला

नको रूढी प्रथांचा भार येणार्‍या पिढ्यांनाही

करू या हद्दपारी अंधश्रध्दांची जगायाला

कधी सांगून गोष्टी तर कधी शिकवून आईने

उद्याची नीव ठेवाया, दिले संस्कार बाळाला

सहिष्णू व्हायच्याआधी असावे खूप बलशाली

नसावी मजबुरी बनण्या सहिष्णू दीन दुबळ्याला

कधी सांगून रडगाणे कुणाचे दु:ख का गेले?

असावे ध्यान थोडेसे तरी दबल्या उसास्याला

नको "निशिकांत "आता जास्त भळभळणे कुणासाठी

कधीही एकतर्फी प्रेम देते जन्म दु:खाला

निशिकांत देशपांडे. मो.क्र. ९८९० ९९०२३