काय हे झाले कळेना

 वादळांना काय हे झाले कळेना

शांततेशी तह कसे केले कळेना

खेळ सरला, चेहर्‍यावर ना खुशी गम

जिंकलेले कोण हरलेले कळेना

चावडी, देऊळ, शाळाही दिसेना

गाव कोठे येथले गेले कळेना

शायरीमधुनी तुझ्या डोकावते जी

ती नसोनी का तिने छळले कळेना

जिंकल्याचा कैफ इतका दांडगा की

केवढे प्यादे बळी गेले कळेना

आत्मवृत्ताची तशी कोरीच पाने

काय लिहिण्यासारखे घडले कळेना

भेट घ्याया तू सखे येतेस स्वप्नी

आज का तू दार टकटकले कळेना

मी लिहायाला हझल बसलो परंतू

दु:ख घर शोधीत का आले कळेना

तारवटले का असे " निशिकांत " डोळे?

केवढे प्यालास तू प्याले कळेना

निशिकांत देशपांडे. मो.क्र. ९८९०७ ९९०२३