हसायचे कसे?

दु:ख जाणतो हळूच जोजवायचे कसे
घ्या शिकून कारणाविना हसायचे कसे

नांदते मनात भय तिच्या शिकार व्हायचे
वादळात झोपडीस वाचवायचे कसे?

झेलण्यास संकटे रहा तयार सर्वदा
गप्प बैस वादळा! असे म्हणायचे कसे?

पाठ्य पुस्तके नि शिक्षणात पाहिजे बदल
पांगळ्यास पाठ द्या, नभी उडायचे कसे

शोधुनी अनेक उत्तरे न शोध थांबला
उत्तरात कैक प्रश्न, सोडवायचे कसे?

काल, आज अन् उद्यात आज आवडे मला
भूत काळ अन् उद्यात वावरायचे कसे?

चर्च ना दिसे कुठे पाप सर्व सांगण्या
आपुल्यांसमोर स्पष्ट व्यक्त व्हायचे कसे?

वाटते मला तसे जगावयास ना मिळे
फक्त श्वास घ्यावया जगी रहायचे कसे?

मरगळीतला समाज थंड थंड जाहला
बंडखोर व्हावयास धगधगायचे कसे?


निशिकांत देश्पांडे.मो.क्र. ९८९०७ ९९०२३