एकतारी छेडतो

 एकटा असल्यामुळे मी एकतारी छेडतो

वेळ जातो! सूर केंव्हा लागतो ना लागतो

वाजवाया लागलो टिमकी जशी माझीच मी

लोक जाती दूर, म्हणणे मीच माझे ऐकतो

जीव तोडुन सांगतो पण का मुले आव्हेरती?

कोपर्‍यातिल सुरकुत्यांना कोण हल्ली मोजतो?

चोंच आहे ज्या ठिकाणी देव देतो घासही

पण तरी जो तो उद्याच्या काळजीने ग्रासतो

भिन्न चित्रे! देव कष्टाविन कमवतो मंदिरी 

भीक कोणी पायर्‍यावर दीनवाणा मागतो

मान्य वाळूचे! तरीही बांधले होतेच ना!

त्या घराला आजही पण राजवाडा मानतो

बाहुला अन् बाहुलीचे लग्न होते लावले

बाहुली होती जिची तिज आजही धुंडाळतो

वादळे येती नि जाती, का उगा चिंता मनी?

शांतता चिरकाल टिकते, मी जिला गोंजारतो

स्वर्गही झाला नकोसा का असा "निशिकांत"ला?

भूतलावर आपुल्यांच्या रंगरंगी  रंगतो

निशिकांत देशपांडे, पुणे.

मो. क्र. ९८९०७ ९९०२३

व्रत्त--देवप्रिया

लगावली--गालगागा X ३ + गालगा