ओल थोडी काळजाला पाहिजे

 ग्रिष्म आता "काल"झाला पाहिजे

ओल थोडी काळजाला पाहिजे

तेच ते पण सोडल्याने जीवनी

शांतताही वादळाला पाहिजे

झोपणारा शर्यतीसाठी ससा

ना दिसे, जो कासवाला पाहिजे

बाळगावे स्वप्न एखादे असे

ध्यास पूर्तीचा मनाला पाहिजे

चेहर्‍यावर केवढे हे चेहरे!

आत लपलेला कळाला पाहिजे

रंग भरण्याला सुखाचे जीवनी

दु:ख थोडेसे उशाला पाहिजे

तेल वांग्यांचे वड्यावर का असे? 

एक दुबळा दंडण्याला पाहिजे

एकदा दु:खी बघू मोनालिसा

हास्य छापिलसे कशाला पाहिजे?

वाद का "निशिकांत"इतके वाढले?

मोकळे बोलावयाला पाहिजे

निशिकांत देशपांडे, पुणे.

मो.क्र. ९८९०७ ९९०२३

वृत्त--मेनका

लगावली--गालगागा गालगागा गालगा