जगतो आहे

 

कार्य संपले, कारण नसता जगतो आहे

तेल संपले दिवा तरीही जळतो आहे

कळत नसोनी हात, कुंडली बघतो आहे

भोळ्यांना मी भ्रामक स्वप्ने विकतो आहे

सर्व सुखे उपभोगुन सुध्दा तृप्ती नसते

मृगजळ दिसता जो तो मागे पळतो आहे

भविष्य नाही ज्याच्या पुढती तोच बिचारा

भूतकाळच्या आठवणीतच रमतो आहे

खरा चेहरा मुख्वट्यात मी पांघरल्याने

सत्य जगाला सांगाया घाबरतो आहे

आत ओलसर, खपली बसलेल्या जखमेला

आठवणींना जपावया टोकरतो आहे

नकोच आता कुणातही पण पुन्हा गुंतणे

गळ्याभोवती पाश जुना करकचतो आहे

तुझ्या मनीचे गूज अताशा मला कळेना

सखे मनी मी असून माझ्या नसतो आहे

फाडलेस " निशिकांत " केवढे कागद वेड्या!

सखीस करण्या शब्दांकित धडपडतो आहे

निशिकांत देशपांडे, पुणे.

मो क्र, ९८९०७ ९९०२३