काय सांगू काय झाले वादळाला?
का कपातच लागले घोंगावयाला?
वाद होता का न समझोता करावा?
कोर्ट घेते वेळ निर्णय द्यावयाला
एवढी का हाव आभासी जगाची?
का असे विसरून जावे वास्तवाला?
जे न कळते वारसांना पित्रपक्षी
मी भटकतो, जाण आहे कावळ्याला
देव जाणे! देव जाणे! बोलताना
वाटते ना जाण उरली माणसाला
भाव पडतो ज्या ठिकाणी आसवांचा
आळवावे लागते परमेश्वराला
मी तसा निरुपद्रवी होऊन जगलो
पाप पुण्याचा न करता बोलबाला
वृत्त, मात्रा, काफियातच धुंद असतो
विश्व दिसते यातुनी तर शायराला!
पोस्ट केली एक चारोळी नि चर्चा
शोभते का काव्य असले शायराला?
बेफिकिर "निशिकांत" का जगतोस इतका?
पामराची काळजी त्या विठ्ठलाला
निशिकांत देशपांडे, पुणे.
मो. क्र. ९८९०७ ९९०२३
वृत्त---मंजुघोषा
लगावली---गालगागा X ३
No comments:
Post a Comment