ईश्वराचा वाजवावा का नगारा?
तारणारा तोच होतो मारणारा
हो स्वयंभू कासरा हातात घे तू
देत असतो का कुणी कोणा सहारा?
लाचखोरांचाच सारा दोष नसतो
भ्रष्ट करतो चांगल्यांना चारणारा
राहण्या शहरात आलो अन् विसरलो
शीळ गावी घालणारा रानवारा
रात्र काळोखी असूदे केवढीही
पण दिसावा ध्येयरूपी शुक्रतारा
देव देव्हार्‍यात नाही आज कळले
व्यर्थ केल्या मंदिरांच्या येरझारा
दार उघडे ठेवले असुनी मनाचे
एकटेपण हाच माझा कोंडमारा
भार ना व्हावे कुणावरती म्हणोनी
जाहलो माझी कबर मी खोदणारा
प्रेम का "निशिकांत" मिळते शोधल्याने?
अनुभवावा माय देते तो उबारा
निशिकांत देशपांडे. मो.क्र. ९८९०७ ९९०२३
E Mail--- nishides1944@yahoo.com
