तरीही बोलते आहे

जरी मौनात आहे मी, तरीही बोलते आहे
किती ओठास शिवले पण मनी मी उसवते आहे

पुन्हा भेटायचे नाही असे निक्षून म्हणताना
मला ठाऊक असते की मला मी फसवते आहे

नवी उर्मी नवी उर्जा अता लाभेल देशाला
स्वदेशी मूलमंत्राला प्रजा उद्घोषते आहे

करावी पेरणी का स्वप्नदेशीही सुरुंगांची?
ढिगारे खोदुनी ठिकर्‍यात स्वप्ने शोधते आहे

कशी अंगात येते माय अंबा? पाहिजे तेंव्हा
भुकेला देवभक्तीचीच संगत भावते आहे

स्वप्राणाने तुतारी फुंकण्याची जिद्द कोणाला?
तुझी केशवसुता कविता कुणी ना वाचते आहे

दिला संदेश शांतीचा तरी त्या गौतमालाही
कुठे एकांत शोधावा? समस्या काचते आहे

नव्या रक्तास द्यावा वाव ही चर्चा निघाली की
पुढार्‍यांच्या मुलांची रांग येथे लागते आहे

निराशा का अशी "निशिकांत "ला बेजार करणारी?
अताशा लालिमेला कालिमा धिक्कारते आहे


निशिकांत देशपांडे. मो.क्र. ९८९०७ ९९०२३