उशाला सुखाची चवड घेतलेली
तरी शांत निद्रा नसे लागलेली
गुणायास मी घेतले आकडे पण
मिळाली कशी उत्तरे भागलेली
करायास उपदेश सर्वांस येते
न दिसली तशी माणसे वागलेली
जगाचा तसा काय इतिहास आहे?
तळाला गरीबी सदा साचलेली
हजारात संख्या अशा पुस्तकांची
न कामास आली तरी वाचलेली
जरासे हसाया घरी पण शिकावे
मने सांधती दोन भेगाळलेली
असो राधिका वा असो आर्त मीरा
कुणाला म्हणू जास्त भक्ताळलेली?
कुणाचा असे दोष हा प्रश्न नाही
करू या घडी नीट चुरगाळलेली
नको काच घेऊस "निशिकांत "वेड्या
उडाली जरी लेकरे पोसलेली
निशिकांत देशपांडे. मो.क्र. ९८९०७ ९९०२३
No comments:
Post a Comment