गर्दी मनात आहे

 मी एकटा तरीही गर्दी मनात आहे

दिनरात आठवांची निघते वरात आहे

माथ्यावरी प्रभूच्या मस्तीत आज जगते

ना काळजी उद्याची, धुंदी फुलात आहे

का टाकलेस आई, रस्त्यावरी मला तू?

केलेस पाप तू पण मी का उन्हात आहे?

गोंदून हास्य जगतो तोंडावरी, असा का

करतोय मी जगाचा विश्वासघात आहे?

गर्भामधील स्त्रीभ्रुण घेईल जन्म नक्की

भाऊ जुळ्यात म्हणुनी येते जगात आहे

आता पुरे तपस्या, तप मोडण्यास नक्की

येईल मेनका हा इथला प्रघात आहे

उठवून वादळांना ती शांत शांत असते

घ्यायास वादळे मी तत्पर कपात आहे

बंडात खंड आला स्फुल्लिंग संपल्याने

आता हरेक नेता, चरतो सुखात आहे

"निशिकांत"वाममार्गी रमलास का असा तू?

सन्मार्ग दावणारा कोल्हा उसात आहे

निशिकांत देशपांडे, पुणे.

मो.क्र. ९८९०७ ९९०२३

वृत्त--आनंदकंद

लगावली--गागाल गाल गागाX२