गुलमोहरतो आहे

वार्धक्याच्या चष्म्यामधुनी बघतो आहे

आठवणींनी मनात गुलमोहरतो आहे

आज करोनी पुण्य, फळाची वाट बघावी

वसुली नगदी मधे देवही करतो आहे

उपकाराचे ओझे इतके! कधी वाटते

फक्त हमाली करण्यासाठी जगतो आहे

एसी नाही शॉवर नाही कसे जगावे!

तकलादू दु:खांनी जो तो खचतो आहे

चंगळवादी जगात सारे एकएकटे

व्यक्त व्हावया मी मजशी  बडबडतो आहे 

सागर लाटा रौद्र दिसाया, तळास शांती

तळातला का माझा बाबा लपतो आहे?

शांत निरामय जगावयाच्या सायंकाळी

पोटासाठी आयुष्या वणवणतो आहे

अंधाराचे राज्य पसरले समजू शकतो

पण मी माझ्यातून असा का विझतो आहे?

काय असा "निशिकांत "जाहला गुन्हा एवढा?

आठवणींचा कैदी, चक्की पिसतो आहे

निशिकांत देशपांडे, पुणे.

मो. क्र. ९८९०७ ९९०२३