झुकोनी हात जोडले

 साखरेत घोळले तरीही कडू कारले

संस्कारांनी पुढे झुकोनी हात जोडले

सटवाईने जे लिहिले ते कुणी वाचले?

अनिष्ट घडता खापर माथी तिच्या फोडले

व्यथा सांगण्या देवाजवळी पाप पोंचले

"ज्यांना मी भेटलो, तयांनी गळे काढले"

प्रगतीसाठी लढावयाचे दिवस संपले

दंग्यामध्ये लढणारे पण खूप वाढले

पिले उडाली, पक्षिणीस हे दु:ख पोळले

जन्म द्यायचा पिलास नवख्या, तिने टाळले

नर गातो पण "कोकिळकंठा"शब्द नसावा!

अन् भाषेने "कोकिळकंठी"कसे शोधले?

भय नसते ती स्वप्नी भेटाया येण्याचे

ती येताना कधीच नाही दार वाजले

पुण्य चिमुटभर, पाप घडाभर सोबत होते

मिळेल मजला मोक्ष ईश्वरा तरी वाटले

खरीदले "निशिकांत "दु:ख का नगदीमध्ये?

उधारीत का बघावेस तू स्वप्न चांगले?

निशिकांत देशपांडे, पुणे.

मो.क्र. ९८९०७ ९९०२३