थकलो आहे

 

काम करोनी गझलेवरती थकलो आहे

पुन्हा एकदा कवितेसंगे जुडलो आहे

फक्त खयाली पुलाव म्हणजे गझल जाहली

आशय शोधत दलदलीत या फसलो आहे

मार्तंडांची दहशत गझले तुझ्या अंगणी

हात जोडुनी दुरून वापस फिरलो आहे

असो अधूरे, स्वप्न असावे डोळ्यामध्ये

काय फायदा झोप न येते, निजलो आहे

पुस्तक एका चिठ्ठीवरती लिहून मेले

"मोबाइल आल्याने पुरता खचलो आहे"

खूप वाचला, देव मला उलगडला नाही

तसा मी तरी मला कितीसा कळलो आहे?

आयुष्याची फरपट सांगू कशी कुणाला?

मरण्याआधी मरून शतदा जगलो आहे

वृथा उद्याची आज काळजी करताना मी

आनंदाला सदा आजच्या मुकलो आहे

जाहलास "निशिकांत" एवढा बंडखोर का?

लिहाज राखुन बड्याबड्यांंचा विटलो आहे

निशिकांत देशपांडे, पुणे.

मो.क्र. ९८९०७ ९९०२३