कशी काय जावी उदासी मनाची?
अरे जीवना दे मुभा हासण्याची!
मनी ओढ नांदे अशास्वत सुखाची
म्हणोनी न झाली कृपा विट्ठ्लाची
जसे लागती मुंगळे साखरेला
तशी चाललो वाट पंढरपुराची
चरे केवढे! कोरड्या का कपारी?
करा काळजी नेहमी काळजाची
रुढी अन् प्रथांनी तिला कैद केले
मना फक्त मिळते मुभा गुदमराची
तुझे चोरले मन कुणी ना कळाले
नसावी तिची जात पण तस्कराची
कुणाचा असे दोष चर्चा कशाला?
तयारी करा वाद मिटवावयाची
अबोल्यातली शांतता का जपावी
जिने वाढते शक्यता वादळाची
तुझे काय "निशिकांत" म्हणणे कळू दे!
सवय सोड पोटात लपवावयाची
निशिकांत देशपांडे, पुणे.
मो. क्र. ९८९०७ ९९०२३
वृत्त-- भुजंगप्रयात
लगावली-- लगागा X ४
No comments:
Post a Comment